圖片來源︰http://www.uwants.com/viewthread.php?tid=5429775&extra=page%3D1&page=1 Uwant討論區–興建中的牛下

編按︰以下故事絶對應引以為戒,幾星期前到過牛頭角邨一遊,發現到處都是相機,四周都是閃燈,活像動物園般,試問街坊又怎可正常生活呢?

文章來源︰蘋果日報 9-4-2009  李八方

原文題目︰隔牆有耳:牛下「鬧鬼」

天星失守、皇后駕崩後,香港人懷舊成狂,喺一片慕古氛圍之中,加上傳媒推波助瀾,快將拆卸重建嘅牛頭角下邨成為近期最潮景點,個個周末邨內塞爆無數龍友,男女老幼喺邨內擺甫士留影,屋邨係公眾地方,入去影相奈你唔何,不過肆無忌憚登堂入室,騷擾到居民就令人反感,搞到神憎鬼厭,牛頭角順嫂唔鬧鬼你班友就奇!

龍友擅闖民居影相

邨民對遊客湧至不勝其擾,群起向房屋署投訴,房署噚日發出新聞稿,呼籲市民去牛下影相要適可而止,事關邨內仲有約3,100伙人同160間商舖未搬走,邨外人當牛下係旅遊景點,好影響邨民日常生活。房署咁做好罕有,據稱係因為復活節假期將至,估計會有更多龍友入邨,所以先旨聲明,希望龍友尊重居民,唔好擅闖民居。

房署方面冇統計訪客數目,八方問過部份街坊,佢哋話邨外人嚟影相,確係有越嚟越離譜迹象,唔單止侵犯邨民私隱不斷影人哋相,甚至隨意入埋人哋間屋攞景。咁多人咁唔守規矩,八方建議邨民搵實Q睇場,好似門神咁趕走不速之客。

興記茶餐廳負責人恒哥話,知道有街坊不滿邨外人滋擾,佢話有啲龍友用閃光燈狂影相,真係會嚇親老人家,仲驚嚇過董太全副裝備駕到,而且條邨多咗大量陌生人,街坊都擔心影響治安。雖然邨外人搞搞震,但唔係冇幫襯,八方聽聞邨內食肆近月生意以雙位數增長,有啲舖頭仲要請兼職應付人潮!執笠在即,最後餘暉竟然咁燦爛,證明香港人唔知珍惜,曾經有條屋邨擺在面前,偏偏要等到拆樓先後悔,塵世間最痛苦嘅事,莫過於此,如果一定要加個清拆期限,一萬年夠未?

有邨民話畀八方聽,房署忽然勸止訪客可能同牛下要押後拆卸有關,佢哋聽聞由於供邨民調遷嘅新屋邨未能如期下月入伙,意味邨民可能要喺牛下住多幾個月,訪客不斷好唔方便,因此房署要喝止龍友越軌。房署發言人則話調遷時間表冇變,邨民最快本月底攞到新屋鎖匙,至於幾時拆牛下,暫時未有開工時間。

廣告