文章來源︰蘋果日報 3-9-2011

地產霸權橫行,樓價高到離晒譜,市民要買樓安居樂業都好難吓,外界成日都話市建局同發展商以重建為名,炒高樓市,係幫兇之一。噚日市建局主席張震遠出席電台節目時出口撐發展商,話近年樓價升得好快,市民可能因為買唔起樓唔高興,但市民將發展商標籤為衰人,講法唔係好公平喎,又話唔係個個發展商都有錢賺,要面對好多風險咁話。不過八方就認為,做得生意就預咗有賺有蝕o架啦,有時係咪真係要賺到盡,不斷推高樓價呢?

至於市建局又有乜大計?張主席話市區有成4,000幢樓齡高達50年嘅舊樓,居住環境好惡劣,但o依家市區重建速度太慢,有需要加速進行,希望年初政府推出的市區重建策略可以幫到居民,加快重建速度。市建局過去10年的發展項目,實用率都有成七成半,但o依家諗緊日後重建項目單位嘅設計,可以參考建築師學會建議嘅實而不華,好似大堂、會所設施、小型單位應否採用開放式設計等等,目前正收集市民意見,最快今個月底有結果。