轉載︰都市日報f 17-11-2012 Executive日記 

喺觀塘同仁街開咗九年嘅愛心「小食站」,受市區重建影響,噚日正式光榮結業。「小食站」老闆娘,人稱「霞姐」嘅潘鳳霞,趁噚日最後一天營業,將新鮮嘅墨魚丸、雞肉等串燒免費送給街坊食,以答謝長期幫襯嘅街坊,引來店外整日大排長龍。有街坊話,呢間食店嘅串燒非常惹味,仲話食店嘅沙爹燒雞翼好食過鏞記燒鵝喎,好唔捨得店舖結業。

為咗回饋街坊,霞姐同班員工噚日一早返到「小食站」準備,仲專登提前晏晝十二點開鋪。唔少老街坊聞風而至,排隊免費享用熱辣辣烤串燒嘅同時,順便跟霞姐聚聚舊同埋告別。但係因為太多街坊捧場,啲串燒兩點半就派晒,搞到佢要臨時入貨,五點鐘重開再派過。

霞姐估計全日派咗過千條串燒出去,使咗成五、六千蚊,但佢就話,最緊要班街坊開心,冇錢賺都唔緊要。好多街坊話小食站啲串燒特別好味,本身係文化人嘅誠品書店副店長鄧小樺都話「堅好食」,唔捨得間食店結業。

霞姐間食店有同食物銀行合作,印製食物券,只要手持食物券,就可換取食物。她多年為基層作出的善心,令佢今年七月獲社署頒發「傑出社區愛心商戶」。霞姐同Kelly講,好唔捨得間鋪頭同埋班夥計,佢連月來喺同區積極搵舖,但都未有結果。「我𠵱家舖租每月三萬八,但其他同區同樣舖位已經飆升到六至七萬蚊一個月,舖位大啲仲要成十幾萬。」霞姐話若果再搵唔到舖位,就會考慮搬到去九龍東區繼續經營。

廣告