You are currently browsing 小烈’s articles.

http://the-sun.on.cc/cnt/news/20120430/00407_018.html?pubdate=20120430

【記者鍾雅宜報道】又一間老店敵不過時代步伐瀕結業!屹立香江逾五十年、本港首間麻雀館「雞記」於觀塘具三十六年歷史的分店,早前被納入觀塘重建範圍,原定明年獲出價收購,因當局加快重建而提早議價,但店東不滿市區重建局以鄰近店舖五分一賤價收購,「雞記」無法在同區重覓舖位,老店結業會令六十員工失業。市建局強調已提供充裕時間予業主考慮收購,又指同一街道大部分商戶已接納收購建議,進度理想。

位於觀塘仁愛圍的雞記屬四間分店中最「年輕」的老舖,該館第二代「揸fit人」「雞叔」林國強七六年開下此分店,三十六年來風浪盡排,最困難的沙士時期亦捱得過,卻隨時敵不過重建。
36年歷史 60員工將失業
雞叔長子林偉森說市建局○八年年底向該店面積合共一千三百平方呎的兩舖提出收購,但因價錢太低未達成協議,市建局曾透露將在四年半內再次出價,不料去年三月突然加快重建,今年初得知收購價為每平方呎一萬二千元。政府早前刊憲,該區物業會於六月二日復歸政府,由政府與商戶協議補償。
林偉森引述兩間市建局認可的測量師估價結果,均指該舖呎價最少達每平方呎二萬四千元,即市建局出價的一倍,林批評市建局欠誠意。
 
年近九旬的雞叔一手創立雞記三間分店,由式微再成功轉型,每年生意均有一成增長,眼見三十六年心血面臨倒閉,無奈說:「好多客人日日嚟打牌,好唔捨得啲街坊,仲有六十幾個員工,做唔住佢哋就失業。」
 
市建局發言人不評論個別商戶的收購建議,但指○八年底首次提出收購,業主有九十日考慮建議,多於一般六十日期限,業主應有充裕時間考慮,當局亦於去年三月已告知業主有意加快重建步伐。觀塘市中心項目至今已成功收購逾九成業權,仁愛圍的大部分商戶已接納收購建議。

其實在兩個星期前, 即是中秋節翌日假期, 我跟我朋友本想再次遊歷我小時侯長大的觀塘物華街光輝大廈,

我初時心想, 應該很易進去吧. 但是原來而家看守著大廈的, 已經不是以前那個年代的看更阿伯…

而是一個穿著制服, 看似40多歲的女保安員, 此女保安員看似師奶, 但係佢講野都強硬, 我們表明來意話想入去影幾張相,

佢話唔得, 要我地同乜乜(我都唔記得乜野機構)申請左, 先可以入去, 佢仲好大條道理話,

如果你呀, 你自己果層樓有外人來你都唔鍾意啦 (其實佢態度好好, 只係我表達返出來唔係咁好)

結果真係入唔到去, 我唯有懷著失望+絕望的心情離開, 因為真係覺得, 我以為都唔係旨意再入去了…

今日講既係咁多… 所以如果各位版友想再次去觀塘舊樓作家訪, 大家要事前做點功夫了, 同埋如果真係申請左去行, 記得叫埋我. 謝謝!

文章來源︰蘋果日報 30-7-2011

http://hk.apple.nextmedia.com/template/apple/art_main.php?iss_id=20110730&sec_id=4104&subsec_id=11867&art_id=15478711

掙扎求存
唯一賽鴿店或上絕路

在仁信里棚屋裏有本港碩果僅存的賽鴿店「國際鴿舍」,店主梁錦洪見證觀塘由當年有 10多間白鴿店,演變至今天全港只此一間。開業 30多年,沙士、金融風暴及禽流感等難關通通捱過,如過不了重建這一關,也只好走上結業這條絕路。
儘管鴿店是梁錦洪的父親數十年前以 10多萬元真金白銀購入。但市建局卻以鴿店位處官地,即使被納入在觀塘重建項目範圍內,也不符合安置或補償等資格。

征戰各地獲獎無數
他飼養的白鴿身價動輒 3、 4萬元一隻,曾參加世界各地的賽鴿比賽,獲獎無數,「呢隻幾年前返國內參賽,由上海飛返香港第一名,贏咗 50萬獎金。」一場比賽放鴿數千,但最後可能只有寥寥數隻回歸。他說, 97回歸及美國阿特蘭大殘奧的放鴿活動是由他一手安排。可惜賽鴿這玩意在香港早已式微,反而內地越來越盛行,不少玩家更專程來港光顧其鴿店。
面臨重建發展,他希望獲賠償和安置繼續經營,讓他和鴿店能夠活下去。「唔准我養鴿,都唔知點養屋企人,我仲有兩個細路要供佢哋讀書。」
《蘋果》記者
=================================================================
http://hk.apple.nextmedia.com/template/apple/art_main.php?iss_id=20110730&sec_id=4104&subsec_id=11867&art_id=15478712
養活四代
30年前三毫一碗腩麪

一碗牛腩麪,見證觀塘歷史 30多年!裕民坊巴士總站旁一條小巷,經常飄着一股牛腩香。當年一碗麪賣 3毫,現時賣 22元一碗。在輔仁街經營「合興粉麵家」的馬老闆( 77歲),看着熙來攘往的街道,慨嘆這裏重建只能結束經營多年的老舖,最不捨的,是幫襯多年的老街坊。

「以前呢度係一座山,睇住佢慢慢改成家咁」。馬老闆看着牛腩舖前的巴士總站,由興建至快將清拆,當年各小販爭相擺賣的情況歷歷在目。牛腩麪店養活馬家四代,由當初一間蚊型小店,慢慢擴大至擁有兩間店舖,員工都是跟隨他 20多年的老夥計,就如家人一樣,「結業一定會補足畀佢哋」。

最難忘記老街坊
一張張老街坊的面孔,始終未能忘懷。記者到麪店時正值午飯時間,僅約三百呎的舖面擠滿食客,大多為光顧多年的四、五十歲「老街坊」。一對頭髮斑白的老夫婦一邊吃牛腩麪,一邊讚不絕口道:「幫襯咗一年半載,經過呢頭都會嚟,牛雜好好味!」這裏裝修不算奢華,地方不見闊落,卻勝在濃濃的人情味。
《蘋果》記者
=============================================================
http://hk.apple.nextmedia.com/template/apple/art_main.php?iss_id=20110730&sec_id=4104&subsec_id=11867&art_id=15478713
見證興衰
模型店陪伴 80後成長

在仁愛圍巴士總站旁邊的「偉利模型」,對很多在觀塘成長的人來說都是不可多得的回憶:「以前啲人玩四驅車多,家都係玩 Gundum了。」老闆陳先生自 80年就在模型店工作,上任老闆退休後,他接手經營至今。陳先生慨嘆近年玩模型的人越來越少,「以前小朋友放學會嚟睇模型,嗰陣邊有咁多嘢玩!家個個都上網同打遊戲機。」

「十幾年前好多小朋友嚟,睇住佢哋細細個嚟買模型,到大個咗之後結婚生埋小朋友,都會帶埋自己個仔嚟一齊買生日禮物。有啲移民咗去外國好多年,但每次返香港都會返嚟幫襯,外國冇咁多呢啲嘢買嘛!」偉利模型的鎮店之寶是一隻「日之丸」木造船模型,陳先生珍而重之,「家已經好少有木造模型喇,通通都係膠造」。

茫然不知何去何從
裕民坊重建後,模型店何去何從?陳先生茫然:「好難喺市區搵到咁大地方嚟賣模型,租金貴成咁,啲貨又霸得多地方,點做?」現時他的店舖租金已由 12,000元大幅加至最近 23,000元。「附近啲人都已經搬走,仲收咁貴租,分明係迫遷!」
《蘋果》記者

文章來源︰蘋果日報 30-7-2011

http://hk.apple.nextmedia.com/template/apple/art_main.php?iss_id=20110730&sec_id=4104&subsec_id=11867&art_id=15478710
舊區將重建 用照片留下老生活痕迹
市民組團尋覓觀塘印記
2011年07月30日

【本報訊】五十年代,觀塘由荒蕪的海灣變身成為第一代衞星城市,繁盛的歷史回憶藏在你我心中。今日觀塘老了,人不能重生,但城市能重建,未來的觀塘市中心自有一番新景象,大家拭目以待。然而,有一群有心人紛紛組團到開始重建發展的裕民坊尋找歲月的痕迹,也有攝影師展開長達 12年的攝影計劃,用照片記錄重建為觀塘帶來之巨變,莫失莫忘。
記者:盧勁業 梁御和 伍雅謙

兩年前牛頭角下邨清拆,掀起「牛下熱潮」,吸引大批市民湧往緬懷一番。下一站將是觀塘,我們熟悉的裕民坊、仁信里棚屋商戶、仁愛圍及小販市集區等,清拆後將不復見,料又掀起「觀塘熱潮」的「潮」拜活動。

記者到觀塘市中心重建區,不時遇到大批手持「單反」相機的年輕人在拍攝,其中多名在大學修讀建築的學生均表示:「呢度唔似商場,冷冰冰冇感情,轉角就見到充滿人情味嘅茶餐廳,過咗咁多年,舊區或多或少都有啲自己嘅味道散發出嚟。」

發起「觀塘社區重建」攝影探索計劃的資深攝影師孫樹坤說:「觀塘的精髓並非建築物,而係人,嗰種幾十年來街坊建立出嚟嘅關係。」計劃參加者來自各行各業,目的是用心記住舊香港的生活方式,為舊區人們的故事留下印記。

任教師的 Chris認為觀塘的舊建築物,代表香港人的拼搏精神,「見到呢度嘅舊燈箱舊建築,自自然然會回想起六、七十年代港人點樣奮鬥同捱出頭,創造經濟奇蹟嘅歷史。」

「好多街坊由細睇到大」
在觀塘幹活多年,見證歷史變遷的小巴司機及小商販,他們的生活就是一本本活生生的香港史書。駕駛小巴來往仁信里至旺角、佐敦道近 30年的司機李先生憶述:「未有地鐵就有呢個站頭。嗰陣啲小巴都冇冷氣,坐開有熟客,見面時大家都會傾吓偈,點都有啲感情。」他慨嘆:「時代進步發展就係咁,要拆都冇辦法!」

在小販市集區擺賣成衣 30多年的黃太說起即將要搬遷,一臉惋惜,她無奈說:「好多街坊由細睇到大,唔到你捨唔捨得 o架啦!雖然呢度冇冷氣,好熱,喺度擺檔,有咁多街坊同小販睇頭睇尾,又同老街坊有講有笑,遲啲搬咗上去(商場),都唔知會唔會見得番啲街坊。」

大家好, 我又來發表感受了, 希望今次的感受不會引來太大迥響吧 (點解咁講? 詳見我上次講述"新麥記"之後果堆回應吧.
我希望大家, 呢度都算係私人地方, 鍾意既咪留個言, 唔鍾意既睇完就算啦, 唔好嘈嘈閉.

廢話講完, 我今次既題目係"觀塘已經開始暗淡無光, 是真的, 都上兩個星期了, 即大約14/5, 我同朋友又再回來觀塘行一圈, 已經發覺更多的商鋪, 住宅已經遷出… 無人做生意, 無人住的地方當然亦都無人會開燈… 所以… 行過觀塘市中心, 即係銀都, 百佳, 裕民坊一帶, 總係覺得唔係好夠光, 條街仲差不多仲黑過鄉村無街燈既地方… 我心諗, 點解好地地一個地方, D樓又未至於就快塌, 點解咁搞咁大個重建? 而且搞重建又拖咁耐, 有D商鋪市民仲可以繼續做生意, 繼續住, 但係隔離附近就搬走晒, 十室九空… 好似好荒廢咁… 其實可唔可以做得好D, 劃一個deadline, 所有人都要果個deadline前遷出, 唔好俾太多荒廢時間出來好嗎? 而家望到觀塘咁暗淡, 我恨不得即時收埋其他鋪, 將整個觀塘加上圍板, 拆晒佢算吧….

上次我又提到, 我很喜歡的裕民坊巴士總站的牛什麵… 唔知幾時會被結束, 上兩星期, 14/5我又去過, 結果… 在內街的麵檔已經全部結業了… 我想見的"所有麵檔一齊last day"無法看見了… 在內街的麵檔我咁大個仔都未幫襯過… 而家無得去試了… 現在只餘下最近巴士總站的一檔, 我食完終於鼓起勇氣問老細, 問佢幾時都會… 佢話佢都未知, 因為佢話人地俾個收購價唔好所以企硬… 即是說, 佢都唔會定下一個last day, 只要有一天佢覺得人地開個價好既就會唔做的了…

(今次好多野想講) 仲有, 20/5無線的街坊廚神係講觀塘, 我睇完之後真係O晒咀, 我自問住了觀塘都廿幾年, 我完完全全沒試過, 也沒聽過佢地節目介紹果D所謂"正野"… 只係行過見過薑汁撞奶囉, 不過我以為係好普通既野食je… 俾個節目講得咁利害… 咁我心目中最代表觀塘既特色野食又係乜? 都係裕民坊麵街啦… 同埋只會深夜出動既推車仔 – 碗仔翅, 豬紅豬腸, 同埋煎蠔餅啦. 可能我唔係太識食, 我都唔會話邊D野好食邊D野難食咁.

好啦, 今日講左好多唔講啦, 我再次提醒各位, 你地睇完我以上感受, 歡迎發表正/反意見, 不過唔好借我題發揮, 去引起罵戰囉唔該.

大家好, 不好意思我很久沒來了, 因為我搬了去土瓜灣居住, 都很少行過觀塘了, 不過我始終都是在觀塘大, 對觀塘有一定的感情. 近日聽朋友說, 康寧道麥記已經執左… 我個心都沉一沉… 不敢相信… 即時回去望一望, 唉… 真的… 實在太令人傷感了…

去到門口, 我咁大個仔, 都未見過呢間麥當勞會在夜晚12時之前關門的(未計佢轉24hrs之前), 而家見到佢關門大吉, 門口仲貼左張咁既紙… 唉… 悲從中來…

原來不知不覺, 呢間麥記都成21年歷史… 21年來, 我們朋友之間, 都會call this麥記as “新麥記", 21年都算新? 哈~ because compare w/ 裕民坊麥記, 呢間算新了, 以前約朋友, 不像而家人人有手提會話"到左打俾我/你啦", 以前約人係在家中電話講定時間地點等, “2點舊麥記門口等" or “2點新麥記門口等"

其實此新麥記既前身係一間酒樓, 我依稀都記得上過去飲茶, 之後轉左麥記, 當時麥記都不太平民, 我媽媽都只係偶爾帶我去吃漢堡飽… 到了中學時段, 終於都可以自己去麥記, 記得當時剛剛有套餐, 所以同同學仔一人一個餐, 所以一人有一包薯條… 哇… 倒晒去其中一個tray一齊分享… 一個小薯條山形成! 而家想起, 真係熱氣到暈耶…

唉, 新麥記已經正式寫入觀塘歷史了… 唔知各位觀塘友對這新麥記又有何回憶? 分享一下吧.

後記: 探訪新麥記呢日, 既然來了觀塘, 當然要行一個圈啦, 發現很多住客都已經遷出… 望上去大部份樓宇都漆黑一片… 😦 再行去麵街, 吃我最喜歡的牛什麵, (廣告: 多年來我只係去近巴士總站那邊的第一檔, 其他的真係未食過, 不過去左咁多年都唔記得佢叫乜名) 真係好唔想麵街執, 雖然這些麵檔多年來加價不斷, 不過唔知點解真係好好食… 心想到左麵街last day果日, 咁多間麵檔老闆會不會放下廿幾三十年來的競爭, 握手言歡, 來個大合照呢? 另外如果有觀塘友知道麵街last day係邊日, 請告知, 我想去吃"最後的晚餐". 謝謝~

上回講到, 去到我兒時的家門前…  眼見已經被貼左告示… 其實我又真係感覺不太強烈喎…
可能因為我都搬走左成10多年啦…
上次話未寫完… 其實都無乜野好寫… (今回文字居多, 請見諒) 行完六樓, 就再往上去, 細個果時其實唔太夠膽上去高過6樓的, 更加唔敢上天台, 因為總係覺得天台好多雜物, 好污漕, 而且可能仲有壞人, 所以小時候只係上過一兩次咁啦…
而家大個仔, 怕什麼? 上去行下囉~ 你睇, 其實個天台幾咁乾淨空曠~
180720091140
真係搞燒烤場都得…
180720091135
天台可以望到好多景… 例如…
望返物華街啦~
180720091136
物華街左邊既輔仁街
180720091138
再轉左邊係旺角小巴站
180720091139
再望遠少少有裕民坊巴士總站, 仲望到帶"挾"(唔記得點寫)左觀塘唔少既apm… (本人個人愚見, 觀塘有今日重建既命運, 都係拜apm所賜)
180720091144
好了, 天台行左一圈, 都係時候走啦, 由樓梯望返落去… 嘩…
180720091153

個行程咁就完啦, 有無悶親各位? 臨走前補多張相, 係樓下大門口跟星星遊戲機中心合照, 此遊戲機中心前身係雜貨店來的.
160820091249

睇左咁耐唔知有無網友以前係住光輝樓6樓既呢? 有的話留個言啦~
bye bye

我細個既時候, 係住在觀塘物華街30號光輝大樓的, 近日行過其樓下, 見到泰林舊址已貼上市建局的通告, 加上果間做左幾十年既老字號金行 – 百年珠寶金行 都執左, 感覺實在好唏噓… 所以, 有一日, 我決定要返去影低我成長既地方, 初時管理處阿叔問我係邊個, 我就即時拿出我中學時的手冊 (我是有備而來的), 証明我以前住過呢度, 解釋一輪話知道呢度就快拆所以想返來影相, 阿叔先放行我咋…  講左咁多, 大家都悶, 不如去相啦~

呢度就係光輝大樓泰林門口, 呢度自從葉繼歡N年前來掃過場之後, 就一直都有架警車泊左嚮度, 幾好架.
020820091197

呢度就係大門口.
180720091158

再上少少, 有個位俾人休息一下, 相片右邊就係管理員阿叔(無影佢), 我細個時好喜歡坐嚮呢度同阿伯吹水的…
180720091157

呢層樓既樓梯設計好獨特, 旋轉型, 每4級同5級一組, 所以我細個時落樓係跳住咁落, 所以雖然無lift, 不過我都可以好快到地面
SANY0011a
咁樣影條樓梯, 有點詭異啊呵~~
180720091154

終於上到我以前住的地方 – 6樓 5/F
180720091133

6樓的走廊…
180720091129
180720091130

到了我屋企啦… 不過已經… 成為大獅子市建局肚裡的午餐了…

SANY0005a
我未寫完架, 今晚再續!

Share this blog

Bookmark and Share

分類

一起紀錄官塘吧! 行動吧!

觀塘市中心重建在即, 店子一個地一個被關上。不論是你的觀塘故事, 又或者透過同街坊傾偈, 所知道的故事, 又或者是攝影和錄像, 都歡迎你跟我們一起紀錄觀塘。我們希望透過這個網頁眾集一班朋友, 紀錄將要逝去的觀塘, 並了解這裏的過去, 再檢討現在的觀塘發展, 是怎麼回事了? 你可透過發郵件到kwuntong2007@gmail.com 或留言在comment裡。 flickr的相,請用「kwuntong」tag住,就可以在下面「看看"我"的官塘」中見到大家的照片

加入我們,一齊紀錄官塘

如果妳/你都有興趣將自已知道的官塘直接告訴大家,也可以電郵至kwuntong2007@gmail.com,就可以成為網站的編輯之一。 不論是文字、相片或是短片都無任歡迎,一齊記錄我們共同的社區故事。 如果想直接貼在此blog上,也可於https://en.wordpress.com/wp-login.php登入,就可以在此貼東西。 Name: kt2007 Password: kwuntong2007

一路下來

有幾多人上來

  • 1,253,510 hits
Creative Commons License
This work is licenced under a Creative Commons Licence.