編按︰這只是趣聞一則，讓筆者回想數年前，市建局主席張震遠，在灣仔街市的工作坊中，大談他對活化和昌大押的觀感，他也感歎「太貴吃不起」，一幅「何不食肉糜」的樣子。香港租金騰貴，市建局應記一功，大量消滅街道，清拆舊區，也趕絶小販和基層的生活，更多市建局的項目，更多像大坑賣雞蛋仔吳先生被壓迫的故事。市民的不幸，在乎不像局方有大量物業和資產，那邊加租，就可搬到另一楝所屬的大廈。誰說公務員不懂做生意，前行政總監林中麟就是好榜樣，低買高放，市建局財技凌厲，不如放棄官方的面具，早點上市，以慰全球的股民。

文章來源︰蘋果日報 15-4-2011

「忘掉種過的花　重新的出發　放棄理想吧　別再看　塵封的囍帖　你正在要搬家…」

謝安琪金曲《囍帖街》憑歌寄意，感慨市區重建局推土機殺入灣仔利東街，搞到街坊家不成家、舖不成舖，勢估唔到風水輪流轉，市建局都有俾人迫遷要搬嘅一日。
市建局 02年起租用上環新紀元廣場做總部，今年初台灣新業主瘋狂加租，由原本個位數嘅呎租，大幅加到幾十蚊一呎，即使市建局同發展商合作賣樓賺到盡，每年有幾十億元盈餘，都要大叫救命頂唔順，好似一般小租戶咁最終被迫搬走。同小市民唔同，市建局冇得攞特惠搬遷津貼或賠償， 80後、保育人士成日批評市建局勾結地產商逼迫小市民，原來市建局面對地產霸權都係咁無奈，主席張震遠可能都要嗌冇陰功。

  新業主狂加租
 有市建局中人透露，今年初各部門已陸續遷出，搬到隔籬嘅中遠大廈。原來市建局早年喺中遠買落三層樓面，一直做收租公，現在捱唔起貴租，順理成章收回自用，慳番大筆租金。據講中遠大廈新總部可用樓面面積同新紀元舊 office差唔多，因此唔算大屋搬細屋，不過景觀就差一截；新紀元視野比較開揚，中遠就望住對面新紀元廣場樓景，而設喺新紀元廣場嘅市建局教育中心堅持「不遷不拆」，因為市民去慣去熟，驚搬咗之後冇人參觀。

市建局 01年正式成立後，翌年租用新紀元廣場低座做總部。當年正值樓市低迷，前行政總監林中麟出名數口精，因為唔想再租用中環中心，每年畀 2,000幾萬租金李超人賺，於是四出物色新 office，結果睇中咗市建局同新世界合作嘅重建項目新紀元廣場，以 70萬元超筍月租，一口氣租咗低座四層寫字樓共 5.5萬平方呎樓面，而隔籬中遠大廈嘅三層自置物業則以市價放租，賺埋租金差價，再次證明傳統智慧，最緊要有磚頭揸手。